Toving

På formingsavdelinga vil Signe vere elevane sin guide inn i ei varm og fargerik verd. Du kan få lære å lage vottar, sitteunderlag, tøfler, hattar, sjal, og mykje anna.

Her er det berre fantasien som set grenser. Material som blir nytta er merinoull, norsk lammeull og grønsåpe.

TV/Film

For TV og film interesserte har vi fullt utstyrt TV-studio der ein kan utfalde seg med gode idear og boltre seg med profft utstyr.

Vi siktar på å lage filmar, reportasjer og innslag til interne TV-sendingar.

Keramikk

Knut og Signe er skulen sine keramikarar. I keramikk valfag får du lære ulike teknikkar og arbeide med ulike typar leire. Vi har eigen heilt ny ovn for brenning og glasering, og sjølvsagt dreieskiver for å lage krukker etc. Opp igjennom åra har kreativiteten hatt gode kår i dette valfaget, og det har blitt laga mykje fint, både koppar, kar og skulpturar.

Kinesisk knutekunst

Har du opplevd å ha altfor mange lause trådar? Kinesisk knutekunst er ei kunsthandtverksfag som har lange tradisjonar i Kina. Sumin som er vår kina-lærar, startar i det små og legg til stadig nye trådar og knutar for å lære deg å skape fasinerande figurar og dekorasjonar av fargerike kinesiske trådar.

Strikking / hekling

Når utgangpunktet er ein lang tråd, er det fasinerande å sjå kva dette kan bli til med nokre meir el. mindre enkle handgrep.

Nivået blir lagt opp utifrå kva den einskilde kan i utgangpunktet.

Teiknefilm

Animasjonhuset har alt som trengs for å lage teiknefilm. Du får lære om klassisk teiknefilmteknikk, og du får vere med å lage film, aleine eller i samarbeid med dei andre på valfaget. Tiina som elles har ansvaret for animasjons-klassa leier valfag teiknefilm.

Dans

Vi ynskjer å ha eit tilbod i dans som passar både til dei som har halde på ei stund og dei som har lyst til å freiste noko nytt.

Innhaldet i valfaget blir delvis lagt opp etter ynskje frå elevane.

Klubb for funksjonshemma - KLUBBEN

KLUBBEN har lange og gode tradisjonar på Møre Folkehøgskule. 8 - 9 onsdagar gjennom året inviterer vi menneske med ulike funksjonshemningar til fest og moro i peisestova på skulen. Det blir laga litt program og servert mat.

Oppslutninga om desse arrangmenta er overveldande og det er alltid stor stemning og dans utover kvelden.

Aktuelle nyheiter

I mengda av nyhende som vi blir bombardert med i store mengder kvar dag, freistar vi i desse timane å gå litt bakom det som media slår stort opp. Vi set fokus både på dei aktuelle sakene og dei sakene som kjem i bakgrunnen. Med meir bakgrunnsmateriale og kunnskapar som utgangspunkt blir det lagt opp til diskusjon og meinings-utveksling.

Musikklytting

Alle høyrer på musikk kvar dag! I musikklytting tar vi utgangspunkt i din og min musikk og lærer meir om den for å få eit meir medvite forhold til det som blir formidla. Vi søkjer den gode musikkopplevinga og freistar å lære noko om musikken. Vi ser på ulike genrer, på tekstar og teknikkar, og kanskje sette det heile inn i ein samfunnsmessig samanheng.

Band - samspel

Samspel utfordrar evnen til å samarbeide og kunne skape noko i fellesskap. For å planlegge band eller samspels-gruppe er vi avhengig av deg som er elev og som kan spele eit instrument. Dette blir utgangspunktet for å plukke ut låtar vi vil spele og kva gruppe vi kan sette saman. Skulen har slagverk og PA-anlegg, og nokre instrument.

Friluftsliv med fotofokus

Friluftslivsfag i lett-utgåve. Ørsta byd på store muligheiter for turar i nærmiljøet. Vi går frå skulen eller brukar ein av bussane våre for å oppsøke naturen og ta gode bilete.

Teikneserie

Teikneserier er eit medium for mykje god humor, og det opnar for å få sagt det ein meiner på ein illustrerande måte. Du får lære om ulike teknikkar, om snakkebobler, lydmalande ord og effektar.

Gitar for ferskingar

Har du ein hemmeleg draum om å bli rockestjerne? Ein stad må du starte. Gitar valfag er retta inn mot deg som ikkje har spela gitar før, og kanskje ikkje noko anna instrument heller.

Med utgangpunkt i enkle songar, får du lære akkordar og fingerspel og om å lese og spele etter tabulatur. Skulen har nokre gitarar som vi kan låne ut, men det er fint om du har med gitar sjølv.